Deutsch / Albanisches Wirtschaftsportal - Format juridike të ndërmarrjeve / e drejta e shoqërive

Firma individuale

Forma e firmës individuale zgjidhet sidomos atëherë kur ndërmarrja ka një madhësi, në bazë të së cilës as në lidhje me xhiron vjetore, as lidhur me aktivitetin ekonomik nuk i nevojitet asaj një organizim që kërkon plotësimin e të gjitha kushteve të kodit tregtar. Atëherë ndërmarrja konsiderohet si biznes i vogël dhe nuk duhet të hartojë një bilanc. Zyrës së financave duhet t'i paraqitet vetëm një llogaritje e hyrjeve dhe daljeve. Përveç kësaj nuk është e detyruar të regjistrohet në regjistrin tregtar. Në këtë rast sipërmarrësi në marrëdhëniet tregtare del me emrin dhe mbiemrin e tij personal. Në kreun e letrës përveç emrit të pronarit mund të përmendet edhe qëllimi i biznesit.

Megjithatë ekziston mundësia që kjo ndërmarrje nëpërmjet një noteri të regjistrohet në regjistrin tregtar që mbahet nga gjykatat lokale përkatëse. Kjo jep avantazhin që ndërmarrja mund të marrë pjesë në jetën ekonomike me një emër të shpikur. Pas regjistrimit Kodi tregtar e klasifikon sipërmarrësin si tregtar dhe e detyron atë të mbajë kontabilitetin me regjistrim të dyfishtë dhe të hartojë bilanca. Në letrat tregtare duhet të përmenden adresa e tij e plotë, gjykata përgjegjëse e regjistrimit dhe numri i regjistrimit në regjistrin tregtar.

Në qoftë se sipërmarrësi do ta zhvillojë biznesin me ortakë, atëherë ekziston mundësia që ndërmarrja të ketë ortakë të heshtur, çfarë do të thotë që ortaku nuk shfaqet në marrëdhëniet me jashtë.

Shoqëri me ortakë

Në qoftë se të gjithë ortakët duan të shfaqen në marrëdhëniet e shoqërisë me jashtë, atëherë pa iu përmbajtur formaliteteve të veçanta mund të themelohet një e ashtuquajtur shoqëri e së drejtës civile.

E ngjashme me shoqërinë e së drejtës civile është shoqëria kolektive, por tek kjo e fundit ortakët regjistrohen në regjistrin tregtar. Në letrat tregtare pas emërtimit të shoqërisë duhet të shtohet "oHG" për të treguar formën juridike.

Shoqëria komandite, që është një formë e veçantë e shoqërisë kolektive, lejon kufizimin e përgjegjësisë së një pjese të ortakëve. Këta përgjigjen vetëm në lartësinë e pjesës së tyre në kapitalin themeltar. Ortakët me një përgjegjësi të tillë të kufizuar, që quhen ortakë të kufizuar, marrin pjesë në fitimin dhe në humbjen e shoqërisë po ashtu vetëm në lartësinë e kontributit të tyre. Krahas ortakëve me përgjegjësi të kufizuar ka dhe një ortak i cili mban përgjegjësi personalisht dhe i cili quhet ortak i pakufizuar. Ky mban përgjegjësi të pakufizuar si një ortak i "oHG"-së.

Ortak me përgjegjësi të pakufizuar i shoqërisë komandite mund të jetë edhe një shoqëri me përgjegjësi të kufizuar ("GmbH"). Në këtë mënyrë përgjegjësia kufizohet në kapitalin e shoqërisë të "GmbH"-së dhe në pjesët që ortakët e kufizuar kanë në kapitalin themeltar.

Shoqëri kapitale

Për ata që themelojnë një ndërmarrje, gati e vetmja formë relevante e shoqërive kapitale është shoqëria me përgjegjësi të kufizuar ("GmbH"). Tek "GmbH"-ja ortakët nuk mbajnë përgjegjësi personalisht, por vetëm me pjesën e tyre në kapitalin themeltar. Kapitali themeltar në moment duhet të jetë akoma të paktën 25.000 Euro, prej të cilit në momentin e themelimit duhet të depozitohen 12.500 Euro. Shlyerja e pjesëve në kapitalin themeltar mund të bëhet përveç me para edhe me kontribute në natyrë me një vlerë përkatëse. Ligjvënësi gjerman po diskuton ndërkohë zbritjen e kapitalit themeltar minimal të nevojshëm në 10.000 Euro. Pritet që ligji përkatës të miratohet që në vitin 2005.

Akti themelues duhet të noterizohet. "GmbH"-ja duhet të regjistrohet në regjistrin tregtar. Për formalitetet e themelimit mund të llogaritet me një shumë prej rreth 500 Eurosh. Gjithashtu ekziston detyrimi i hartimit të bilancit vjetor.

Në bazë të juridiksionit të Gjykatës Evropiane për një ndërmarrje në Gjermani ekziston edhe mundësia për të zgjedhur një formë juridike të huaj.